Guieldu na 40.ª Noite Celta de Porcía
El Franco
Una edición hestórica pa una de les nueches más queríes de la música celta n’Asturies
Dende va 40 años, la familia’l folk asturianu dáse cita cada branu na Noite Celta de Porcía. Durante una nueche, la Alameda d’esti pueblín del occidente asturianu torna convertise nel corazón de la celebración. Una cita que supo guardar l’espíritu col que ñació y que, dende entós, sigue siendo una de les grandes nueches del folk y la música celta n’Asturies.
Ñació en 1984 pol puxu los propios vecinos y esi xeitu sigue siendo una de les sos principales señes d’identidá. L’encantu de la nueche ñaz del propiu llugar y de la xente que la fai posible: l’asociación vecinal La Alameda, encargada d’iguar la cita añu tres añu; los grupos musicales, que conocemos les particularidaes d’esta fiesta y ponemos de la nuesa parte pa afayanos a elles; y un públicu siempre respetuosu col entornu y fiel a la cita.
La Alameda Porcía, arrodiada pol ríu y amparada pol monte, va acoyendo grupinos de coyacios y families que falen, cenen y comparten la folixa mientres la organización fai circular copiosamente les sardines a la plancha. Hai momentos pa baillar y aplaudir delantre l’escenariu y otros pa conversar seliquino so los árboles, sentaos nes mantes o nes silles de camping. Y asina, ente música, charra y viandes, la nueche va enllargándose camín de la madrugada.
Por eso Porcía ye tamién un llugar de reencuentru. Pa quien viven de cerca’l mundu la música folk asturiana, la Noite Celta ye munches vegaes l’alcuentru añal que fai posible atopase con persones conocíes que’l restu l’añu viven lloñe unes d’otres. Músicos, aficionaos y folixeos vuelven vese ellí añu tres añu y, durante unes hores, la Alameda camúdase nel llugar d’axuntanza de bona parte d’esta familia musical.
La maxa Porcía llega acullá de la música. La Noite Celta ta nel imaxinariu lliterariu asturianu al traviés de La Noche Celta, la novela de Juan Noriega. Na so versión orixinal y más estensa, los protagonistes participen na nueche celta y, nun momentu de la hestoria, deciden apartase de la fiesta ya enfusase pel monte. Ellí principia un viaxe fantásticu que los conduz hasta’l castro de Coaña, na Edá del Fierro. La novela sirvió darréu d’inspiración pa la suite sinfónica de Ramón Prada que lleva’l mesmu nome.
Cuatro décades dan pa abondo. Pel escenariu de Porcía esfilaron dalgunes de les formaciones más importantes del folk asturianu, amás de munchos grupos llegaos d’otres fasteres del Arcu Atlánticu. La edición de 2024 axuntó a la Banda de Gaites Marino Tapiega, Deira, Llan de Cubel, la formación bretona Startijenn y Guieldu.
Pa Guieldu, formar parte d’una edición tan simbólica foi un motivu d’especial arguyu. Cuarenta años son una cifra redonda y con fundamentu, y poder tar ellí pa celebralo enriba l’escenariu foi tou un honor. Tamién supusu una responsabilidá: tocar en Porcía ye facelo delantre un públicu mui entendíu, que conoz la música folk y la música celta y que sabe estimar cada propuesta.
La edición de 2024 tuvo amás otru significáu especial pa nós: foi la primer ocasión na que compartimos escenariu con Llan de Cubel, un grupu fundamental del folk asturianu.
Pa Laura, la nuesa teclista y responsable de los sintetizadores, aquella foi tamién una nueche única: ye vecina de Porcía y tocar na Noite Celta significaba facelo, lliteralmente, en casa.
Aquella primera iniciativa vecinal sigue viva cuatro décades depués. Y quiciabes esa seya la meyor forma de celebrar los cuarenta años: que la Noite Celta siga siendo, branu tres branu, una nueche especial nel calendariu del folk asturianu.
¿Quies ver el vídeu?
© Semeyes y vídiu: Enrique M.