La Música que ñaz d'una idega
Guieldu xunta a siete músicos —cuatro homes y trés muyeres— que, dende trayectories ya influencies estremaes, entienden la tradición como'l llugar dende'l que crear música nuevo. Flautes, ocarínes, bouzouki, vigulín, baxu eléctricu, guitarra, baterres y sintetizadores conviven pa dar forma a una sonoridá amplia y rica en matices, au la tradición y creación contemporánea dialoguen con naturalidá.
La gran parte del repertoriu de Guieldu ta formáu por composiciones proies. El so puntu de partida ta nes tradiciones musicales de les naciones celtes, sicasí con una presencia especialmente fonda d'Asturies y del noroeste peninsular —Galicia, Llión, Cantabria y Tres-os-Montes—, nun diálogu permanente con Bretaña, Irlanda y Escocia.
Más que reproducir formes tradicionales, Guieldu desendolca una identidá musical propia. Esta propuesta sonora muévese con naturalidá ente'l folk rock y el folk progresivu, nun discursu musical lóxicu y reconocible qu'incorpora, de mou ocasional, recursos propios del funk y del smooth jazz.
Nes sos composiciones, el fraseu d'una muiñeira, la pulsación d'un jig, la ornamentación irlandesa o la estructura bretona intégrense con naturalidá nesi discursu. Un exerciciu consciente d'interceltismu musical que da llugar a una voz nacida n'Asturies y abierta'l atayu del mundu celta.
La Idega que garra forma
Memories de Deva
Esa manera d'entender la música alcuentra la so espresión principal en Memories de Deva, l'álbum col que Guieldu defín la so identidá artística. Lloñe de concebise como una escoyeta temes, el discu propón un percorríu sonoru nel que ca composición forma parte d'un mesmu universu creativu.
A lo llargo les sos catorce pieces, l'álbum percorre paisaxes, alcordances y emociones inspiraes n'Asturies y nel imaxinariu compartíu de les cultures celtes atlántiques. La memoria, el territoriu y la tradición conviértense nel filu conductor que xune toles composiciones y da forma a una obra coherente, au composición, arreglos y producción falen el mesmu llinguaxe.
Memories de Deva ye la síntesis del universu musical de Guieldu: una obra concebía pa sintise como un tou, au la tradición inspira una creación nueva, fondamente enraigonada y, l'empar, dafechu actual.
La forma que cobra vida
El direutu de Guieldu
Ye sobre l'escenariu au esi universu musical algama la so espresión más grande. Guieldu concibe cada conciertu como una esperiencia distinta, adaptada l'espaciu y al públicu que la recibe. Por eso, la banda presenta dos formatos escénicos complementarios: ún pensáu pa festivales al aire llibre y otru pa teatros y auditorios.
Nos festivales, el conciertu amuesa la so cara más enérxica. El ritmu, la intensidá y la fuercia de la interpretación tresformen ca actuación nuna esperiencia ablucante y participativa, na que'l públicu vive la música dende'l movimientu y la celebración compartida.
En teatros y auditorios, Guieldu esquera una dimensión más íntima y emocional. La escucha atenta, el procuru de les atmósferes y la riqueza de los matices permiten afayar nueves llectures de les sos composiciones. Nesi contestu, aflora con más intensidá la so capacidá pa emocionar y da-y forma a un paisaxe sonoru nel que'l públicu pue dexase llevar pola música.
