Guieldu nel Festival Celta Reinu de Llión
Llión
Una nueche pa estrechar los llazos ente Astures cismontanos y trasmontanos
Contar con dos músicos llioneses nes files de Guieldu fixo que Llión tuviera un llugar nel radar del grupu dende’l primer día. Yá tuvéramos un alcuentru per guapu’l Día San Patriciu, con un llenazu total nel Teatru San Francisco, onde muncha xente, al terminar, dicíanos lo mesmo: «Tenéis que tar nel Reinu de Llión». Esi mesu 2024, en San Froilán, llegó por fin la oportunidá de facelo, abriendo’l festival.
Sinceramente, enantes de salir esperábamos un ambiente daqué xélidu, como la temperatura que facía aquella nueche. Al fríu de finales de setiembre sumábase la incertidume pol cambéu d’ubicación por mor de les obres na Plaza Mayor, l’espaciu habitual del festival y una zona de pasu continuu que fai que’l públicu avérese de manera espontánea. El Parking de San Pedru, detrás de la Catedral, plantegaba una situación bien distinta: al tar más alloñáu, el públicu tenía que dir expresamente al conciertu, teniendo amás otres opciones mui atractives. A la mesma hora celebrábase’l gran eventu de les fiestes, el conciertu de La Pegatina, multitudinariu y mui esperáu dempués de que la so actuación en San Xuan tuviera que suspendese pola agua.
Sicasí, a favor nuesu cuntábamos con un escenariu de primer nivel y un sistema de soníu envidiable, del que’l nuesu técnicu, Andy Da Silva, supo sacar absolutamente tol provechu. L’equilibriu sonoru dende la primer nota, xunto con una lluminación artística cuidada que vistía cada tema, foi clave pa tresformar la explanada de San Pedru ya envolber l’actuación con una atmósfera afayadiza.
Esta producción ayudó a que’l recintu enllenárase aína, con un públicu que llegó con ganes de conciertu dende’l primer minutu. Saber que quien taben ellí fueren expresamente a venos —inclusive, nalgún casu, teniendo que garrar un avión pa nun perder la cita— fixo que la conexón fora tovía más importante. Col escenariu nel so puntu máximu, la música foi caldiando l’ambiente según avanzaba’l repertoriu, pasando de los pasaxes más atmosféricos al baille continuu nel tramu final.
A midida qu’avanzaben les temes, esa respuesta facíase cada vez más visible. Pasóse d’escuchar con atención los primeros compases a acompañar los temes más rítmicos, hasta terminar bailando y disfrutando del conciertu d’una manera que facía difícil alordase de les duldes que teníemos enantes de xubir al escenariu.
Abrir el Reinu de Llión en 2024 dexónos una gran nueche de directu, la prueba de que la música celta tien tirón y la confirmación de que, inclusive cuando media ciudá tenía los güeyos puestos n’otru conciertu, hubo muncha xente que decidió escoyer Guieldu.
© Fotos: Virado Estudio