Guieldu debuta con ésitu en Cataluña xunto a SAL150
valls, tarragona
Un públicu entregáu acompañó con entusiasmu a les dos bandes de Música Celta.
El 26 de setiembre de 2026, Guieldu llegó per primer vegada a Cataluña pa compartir escenariu con Sal150 na Sala RedStar de Valls, nuna tarde-nueche especial pa la banda catalana, que presentaba’l so discu nuevo y obviamente pa nós como debú en Tarragona. La respuesta foi per bona, con una Sala RedStar a rebosar y un públicu que implicáu dende los primeros compases.
Pa Guieldu, esti primer conciertu en Cataluña supunxo un nuevu pasu nuna trayectoria de directos que mos llevó en numberoses ocasiones acullá d’Asturies. Tamos acostumaos a movenos peles comunidaes y provincies del noroeste peninsular (Galiza, Asturies, Cantabria, Llión, Zamora…) y atopanos con públicos estremaos. El conciertu en Cortegana, Huelva, y agora esta primer actuación en Cataluña, xuntu coles esperiencies de la banda en Portugal y Francia, son tamién una amuesa de que la nuesa música pue viaxar más lloñe y coneutar con públicos diferentes ensin perder la maxa ya’l xeitu que carauteriza’l directu de Guieldu.
Dende magar qu’entamó’l conciertu quiximos afitar en Valls la mesma conexón cercano col públicu. Entamamos la nuesa presentación con unes pallabres en catalán, daqué que foi mui bien acoyíu. Dempués, pidimos permisu pa siguir n’asturianu, «la llingua que forma parte de la nuesa identidá». El públicu entendiólo y recibiólo con naturalidá y aplausos.
Y si les pallabres sirvieron pa tender esa primer ponte, la música yá fizo’l restu.
El conciertu foi percorriendo’l nuesu repertoriu, dende los pasaxes más atmosféricos hasta los temes de mayor intensidá. Un de los momentos más emotivos llegó con «Perdayuri,» que dedicamos a Rosa y Miguel, de Sal150. Foi una dedicatoria especial, na que’l so significáu nun precisó demasiaes esplicaciones. El públicu supo entendelo y acompañó la canción con especial atención, ciñu y emoción.
«Oise l’IXUXÚ» punxo a baillar la muñeira a tol mundu y convirtió la sala nuna auténtica folixa. Ente’l públicu taben dalgunos siguidores fieles de Guieldu llegaos dende’l mesmu Valls, Reus o Barcelona, amás de los nuesos amigos del Centru Asturianu de Tarragona, que foron los primeros n’empecipiar el baille y contaxar al restu’l públicu.
La so presencia tuvo un significáu especial pa nós. Atopanos con xente tan entusiasta que caltién vivu’l venceyu con Asturies dende Cataluña y que lleguen a convertise en protagonistes de la fiesta foi una d’eses imáxenes que faen qu’un conciertu como esti tenga daqué más.
Y foi «Asturies danza na Celtia» el tema qu’escaló a lo más alto l’asturianía de la nueche. Un final pa xunir música, identidá y baille y que resumió bona parte de lo que lleváramos a Valls.
Compartir escenariu (y fin de selmana) colos nuesos amigos de Sal150 foi parte esencial d’esta esperiencia. Dos propuestes diferentes qu’atoparon un puntu d’alcuentru nuna cita marcada pola música en vivu y pola conexón col públicu. Pa nós, amás, foi la meyor manera d’estrenanos en Cataluña xunto a una banda cola qu’agora sentimonos xuníos abondo.
El conciertu dexómos una primer esperiencia catalana abegosa d’escaecer. Tarragona foi nel 2026 el debú de Guieldu en Cataluña y la confirmación de que la nuesa música ye per capaz de viaxar y atopar nuevos públicos ensin perder la so capacidá d’emocionar igual qu’en casa.
¿Quies ver el videu?
