Guieldu nel Festillingües
Avilés
Les llingües minorizaes enllenaron La Grapa de música, lliteratura y creación. Guieldu sonó'n ca.
El Festillingües ocutó cuatro díes La Grapa d’Avilés, con una programación que entemeció música, lliteratura, talleres, teatru, alderiques y formes diferentes d’averase a les llingües y cultures minorizaes. Pa nós tenía amás un aliciente especial: el sábadu tocaba tocar en casa, dientro d’un festival que pon nel centru una parte fundamental de la nuesa identidá.
El cachu musical yá empezara’l vienres con Mestura y Rubén Bada. A l’otru día, la programación siguió dende pela mañana con talleres y actividaes alredor de les llingües. Ente elles tuvo’l taller de creación musical de la nuesa amiga Vero Rubio, una d’eses propuestes que valen p’alcordase qu’una llingua nun na más se caltién: tamién val pa crear coses nueves.
Y unes hores dempués tocábanaos a nós cerrar la xornada musical.
Tocar en ca d’un siempres impón ya’l tiempu, arropa d’una manera distinta. La Grapa, la plaza vieya del pescau que güei fae d’entrda’l Centru Niemeyer, ye un espaciu singular d’Avilés y tien daqué d’especial velo ocupáu por mor d’actividaes culturales. Ye unu d’esos llugares que quiciabes podríen tener inda más vida mientres l” añu, y qu’un festival s’atreva a enllenalu de propuestes dellos díes demuestra tou lo que puede faese cuando se aprovechen meyor los llugares que tenemos na villa.
Ye verdá que ye un espaciu amenorgáu, asina que’l nuesu conciertu movióse nes distancies curties, lloñe de dellos «grandes escenarios» qu’acoyeron dalgún conciertu nuesu nel branu. El públicu taba repartíu ente les sielles de les primeres fileres y quien preferíen quedase de pie al fondu. Esti formatu más cercanu llevónos tamién pol llau más atmosféricu de Guieldu, dexando que dalgunos temesy delles cantares furrularen con otra calma.
La rellación cola llingua tamién formó parte del discursu musical. Los nuesos temes cantaos son n’asturianu mayormente , non como una declaración d’intenciones, sinón porque ye la llingua na que nos sale cantar y al tiempu forma parte de la nuesa identidá. N’un festival dediquéu precisamente a les llingües minorizaes yera inevitable pensar nello. L’asturianu sigui ensin tener estatus oficial n’Asturies, mientres qu’el mirandés, el so pariente más cercanu al otru llau de la frontera, ta reconocíu oficialmente en Portugal dende 1999.
Esa lligazón apaez tamién na nuesa música. Angueira, por exemplu, vien d’una melodía popular de Miranda do Douro, nun territoriu au sigui viva la so variante del asturlleonés. Nun fai falta buscar demasiáu pa atopar esos puntos de contautu.
Ya anque’l tonu del conciertu yera otru, como suel pasar cuando tocamos, la música tamién llevó al baille.
De la que se sintieron los primeros acordes d’Óise l’Ixuxú, hubo quien s’arrancó a baillar les muiñeires del set. Un pocu dempués formóse la danza, el baille en corru tan lligáu a la tradición asturiana y especialmente vivu n’Avilés. Mozos y vieyos compartiendo los pasos, ensin demasiaes explicaciones y ensin que naide tuviera que dicilo qu»aquello tamién formaba parte del conciertu.
Son ratinos pequeños, magar que son los que meyor espliquen por qué tien sentíu faer música asina.
El Festillingües falaba mientres tou’l fin de selmana de llingües, de creación y de cultura. Nós llegamos el sábadu pa poner música a tou ello y acabamos atopándonos con daqué entá más senciello: xente cantando, baillando y reconociéndose no que taba pasando delantre l’escenariu.
Tocar en casa tien daqué d’eso. Nun fai falta esplicar demasiao quién yes cuando parte de lo que lleves nes cantares yá ta alredor.
¿Quiés ver el vídiu?
Vídiu y semeyes del Conciertu
© Semeyes: Nacho G.S.
