Guieldu na Romería Ciares
Xixón
Gran nueche na folixa familiar y tradicional qu'apuesta pola música'l país.
Cuando nos propunxeron tocar na Romería Ciares sabíemos que la cita tenía daqué d’especial. Son unes fiestes entá nueves, que nesi momentu celebraben la so quinta edición, pero dan la sensación de llevar muncho más tiempu formando parte del branu xixonés.
Quiciabes porque la xente d’Esto ye Ciares supo recuperar una manera de facer les coses que paecía perdida nel tiempu. Anguaño ye normal que nes fiestes de barriu se subcontraten servicios abondo, pero equí la sensación ye xusto la contraria. La barra, el montaxe, la coordinación… too xira alredior del trabayu voluntariu d’un montón de persones que dediquen hores y hores pa que la romería salga pa alantre.
Eso nótase nos detalles. L’equipu de fútbol llocal, l’Unión Club de Ceares, cede’l so campu pal eventu y l’escenariu móntase nel espaciu de la grada onde ta la cantina. Asina que tien esi aire popular de los escenarios d’obra que, mientres tantos años, presidieron les fiestes de los nuesos pueblos. Pa un grupu tan ampliu de músicos como Guieldu, l’espaciu obligónos a facer dalgún que otru encaxe de bolillos; pero, una vez entamó’l conciertu, entendimos que precisamente esi escenariu forma parte de la personalidá del eventu. Nun tendría’l mesmu prestu en nengún otru sitiu.
Evidentemente, una fiesta llevantada d’esta manera tamién tien los sos propios ritmos. A lo llargu la xornada fueron axustandose los horarios sobre la marcha. Sería fácil quexase, pero tamién ye injustu. Cuando les mesmes persones que monten la infraestructura son les que atienden la barra, reciben a los grupos, solucionen los imprevistos y faen que too funcione, ye normal que’l reló nun marque siempres el pasu exactu. Lo importante ye entender por qué asocede y valorar l’enorme esfuerciu que hai detrás.
Si falamos del tratu recibíu, namái podemos tar bien agradecíos. Dende’l primer momentu fixéronnos sentir como en casa. Tuvimos un camerín a la nuesa disposición (que nun siempres lu hai, nin siquier nos escenarios más grandes), onde, al rematar el conciertu, esperábanos un tentempié pa tola banda. Son detalles que pueden paecer pequeños o superficiales, pero que dicen muncho del procuru que pon la organización. Al final, cuidar de los músicos nun depende tanto del presupuestu como de les ganes de que se sientan bien acoyíos.
Pelo que cinca’l conciertu, la respuesta del públicu foi fantástica. Prestónos especialmente comprobar que, incluso nun ambiente claramente folixeru, la xente escuchó los temes más emotivos coles mesmes ganes coles que depués se llanzó a baillar los más enérxicos. Esa complicidá fixo que tocáremos bien a gustu.
Al finar el conciertu, amás de los munchos amigos y amigues que yá nos siguen dende va tiempu, persones abondes averáronse a saludanos y comentanos que yera la primer vegada qu’escuchaben a Guieldu. Siempres fai ilusión descubrir que la música sigue llegando a públicos nuevos.
La nuesa norabona a la organización, nun solo pol trabayu que hai detrás —que ye inmensu—, sinón por demostrar que otra manera d’entamar una fiesta ye posible —y sostenible— cuando hai ilusión, collaboración y ganes de facer les coses en comuña.
Oxalá la Romería de Ciares siga medrando munchos años más ensin perder esa personalidá que la fai diferente. Nós, dende llueu, volvimos pa casa con mui bon sabor de boca y cola sensación de formar parte de daqué muncho más grande qu’un simple conciertu.
Porque les fiestes populares son, probablemente, el meyor llugar pa que la música del país siga viva. Ye onde les canciones de siempre atopanse con quien les siente por primer vegada; onde la tradición dexa de ser una alcordanza de la xente más vieyo o una coreografía escénica pa convertise tamién nuna esperiencia compartida. Si queremos que la música n’asturianu tenga futuru, tien de siguir sonando nes places, nos barrios y nes romeríes d’Asturies. Y la de Ciares demuestra que eso nun solo ye posible, sinón que tien más sentíu que nunca.
Aquí tenéis un vídiu y delles semeyes:
Vídiu y semeyes del Conciertu
© Fotos: Nacho G.S.
