Guieldu nel festival Les Roches Céltiques
Saint-Étienne, Loira
Música celta y memoria minera nel nuesu pasu per Les Roches Celtiques, na rexón d'Auvernia-Ródano-Alpes
Dende finales de los años noventa, Les Roches Celtiques faise cada branu en Saint-Étienne. Mientres los tres díes, el festival reparte la so actividá ente tres escenarios bien esrtemaos: el Parc Couriot, nel mesmu centru la ciudá; el castiellu Saint-Victor-sur-Loire; y la villa medieval de Rochetaillée, a la vera’l Loira, onde se celebra el día grande. Organizáu pol Conceyu y con entrada de baldre, xunta bandes europees de música celta, folk y folk rock, amás de grupos de danza irlandesa, escocesa y bretona.
Más allá de los conciertos, el festival amesta música, patrimoniu y actividaes pa tolos públicos, faciendo durante esos díes una auténtica celebración alredor de la cultura celta.
El sábadu 4 xunetu del 2026 foi’l nuesu momentu. Subimos al escenariu principal de la villa medieval de Rochetaillée, a los pies del so castiellu, onde’l festival concentra la so xornada grande, compartiendo cartel colos austriacos Celtica – Pipes Rock! y los italianos Jimmy & Scots Folk Band.
Rochetaillée nun llega a los 800 vecinos, y esi sábadu’l pueblu cierra les cais al tráficu: namás se puede llegar en llanzadera de baldre dende Saint-Étienne, a 5 km, pa evitar que quede apináu colos cerca de 4.000 espectadores que xunta cada nueche.
Tres la esperiencia en Bretaña en 2025, la música de Guieldu volvía a cruciar los Pirineos. Esta vegada hasta Saint-Étienne, un conceyu col que compartimos daqué más qu’un escenariu: la memoria de dos territorios marcaos pola minería, separtaos por más de mil kilómetros pero xuníos por una mesma historia del carbón.
Héctor presentó cada tema en francés, amestando referencies a la identidá asturiana —non solo celta, tamién fabril y minera— cola historia industrial de Saint-Étienne. Faló del carbón que nos xune y de la solidaridá de los mineros, esa que marca una forma de ser. Amás, metió dalgunes pallabres propies de la zona, un detalle prestosu que’l públicu recibió con una sonrisa y que ayudó a coneutar dende’l primer momentu.
El repertoriu centrose nel álbum Memories de Deva y, dende los primeros compases, sentimos que taba pasando daqué especial. Lo qu»entamó como curiosidá ante una banda llegada d’un llugar desconocíu, cantando nuna llingua que la mayoría sentía por primer vez, tresformóse nuna complicidá plena: xente baillando, voces acompañando los estribillos ensin entender una pallabra y un silenciu atentu nos pasaxes más íntimos, que solo s’esplica cuando la música ye quien a superar cualquier idioma.
Ente’l públicu había delles banderes d’Asturies. Al terminar, dalgunes persones averáronse a saludanos: un home d’orixe cubanu con güelos asturianos, una pareya de Xixón residente’n Suiza que yá nos viera en Lorient y quixo repetir, y una pareya francesa namorada d’Asturies, una nación celta que hasta entós resultaba-yos desconocida y que descubrieron al traviés de la nuesa música.
Volvimos p’Asturies con kilómetros abondos al renaz, pero tamién con daqué que nun cabe en nenguna maleta: les histories de quien compartió aquella tarde-nueche con nós.
¿Quieres ver el vídeo?
Vídiu y semeyes del Conciertu
© Fotos: Damien Vasseur
