Guieldu na Feria'l Lúpulu y la Cerveza
Carrizu la Ribera
La nuesa música siéntese altu y fuerte na ribera l'Órbigu
Carrizu la Ribera ta na Ribera Alta del Órbigu, xunto al ríu que‑y da nome a la comarca a unos 25Km de Llión capital. Ye una tierra de tradición agrícola y un de los territorios más venceyaos al cultivu del lúpulu n’España, un produtu que forma parte dende va años del paisaxe y de la economía de la zona.
El lúpulu, conocíu tamién como’l «oru verde», ye un ingrediente obligau pa ellaborar la cerveza y atopó nes tierres de la Ribera l’Órbigu unes condiciones per bones pal so cultivu. D’ehí ñaz la Feria del Lúpulo y la Cerveza, una cita que cada branu lleva pa Carrizu cerveza, gastronomía, artesanía, actividaes culturales y música en direutu.
La feria atrái xente de tola provincia de Llión y tamién a munchos veraniantes d’otres zones que pasen esos díes na localidá y alredor d’ella.
Carrizu foi por décades un destín frecuente pa les families asturianes, especialmente las de les cuenques mineres, que buscaben unos díes d’estíu llueñe de la humedá y les nubes. La tradición caltiénse tovía güei y nun son pocos los asturianos que siguen arrimándose, especialmente atraíos pola fama de les sos piscines y pol gran ambiente de la feria.
Y hasta ellí llegó Guieldu’l 31 xunetu de 2025, dientro de la programación de la XVIII Feria del Lúpulo y la Cerveza. La nuesa actuación foi nel Espaciu Lúpulu, l’escenariu principal del recintu, au tocamos bona parte del repertoriu del nuesu discu Memories de Deva.
Pa nós, amás, tocar en tierres llioneses tien siempre un sabor prestosu: dos de los músicos de Guieldu son de Llión. La respuesta de la xente foi xenial y, como ye fácil imaxinar, l’ánimu taba bien enriba dempués de pasar la tarde pelos puestos de cerveza. Foi una nueche folixera, con ganes de música y de pasalo bien.
Como anécdota, el nuesu compañeru Jorge salió al escenariu col so traxe de guirriu, ún de los personaxes tradicionales del antroxu de Carrizo. L’antroxu ye una de les celebraciones más característiques de la localidá y caltién personaxes propios tan singulares como los guirrios, la gomia, la tarara o’l pelleyu.
El guiñu a la cultura llocal y l’alcuentru ente les nueses melodíes y la iconografía del antroxu dieron‑y al conciertu un significáu per guapu. Al acabar, ente abrazos y alderiques so l’escenariu, volvimos comprobar cómo la música ye capaz d’averar tierres y persones, y cómo les tradiciones siguen teniendo sentíu cuando se comparten y evolucionen.
El conciertu de Carrizu formaba parte, amás, d’un branu especialmente intensu pa Guieldu. Namás unes hores dempués de tocar ellí, entamamos a preparar el viaxe a Francia, onde’l 3 d’agostu esperaba por nós el Festival Interceltique de Lorient, ún de los grandes alcuentros internacionales de la música celta.
De la Ribera l’Órbigu a Bretaña. Otru escenariu, otru país y apenes un par de díes de diferencia. El branu de Guieldu siguía’l so camín.