Guieldu na Foguera San Xuan de TrAsona
Corvera d'Asturies
Avivamos la llama musical na Nueche Celta de la foguera d'Asturies
Hay conciertos que preparamos durante selmanes ya otros que paecen llevar años esperándonos. La nueche del 23 xunu del 2026, na Foguera de San Xuan de Corvera, foi una d’eses.
Somos de la zona y sabemos bien lo que representa esta cita. La foguerona de Tresona, declarada Fiesta d’Interés Turísticu, axunta cada añu a miles de persones nel área del embalse pa celebrar el solsticiu con fueu y música. Durante bien de tiempu esta nueche tuvo un marcáu acentu celta: polos sos escenarios pasaron les grandes bandes del folk asturianu, amás de formaciones internacionales bien destacaes que forxaron una identidá que tovía güei forma parte de l’alma la Foguera.
Col pasu los años ye verdá que la programación foi evolucionando p’acomodase a otros formatos y gustos, buscando caltener la so capacidá de convocatoria. Por eso fíxonos una ilusión tremenda que esti añu’l Conceyu recuperara la Nueche Celta y confiara en Guieldu pa pone‑y música.
Yera la oportunidá de reencontranos, anque namás fora por unes hores, con esa parte del espritu celta de la Foguera de Tresona que munchos alcordamos y añoramos. Por eso llegamos a Tresona cola sensación de que nun dibemos simplemente ufiertar un conciertu, sinón devolve‑y identidá a la nueche.
La Banda Gaites de Corvera, dirixida por Bras Rodrigo, abrió’l camín col pasacalles hacia’l pradón mientres cayía la nueche. Magar que diben llegando families, grupos d’amigos, aficionaos al folk, al rock, siguidores de Guieldu y munchísima xente que seguro que nos diba sintir por primer vegada.
El públicu foi sumándose y coneutando cola música hasta camudar el conciertu en dalgo compartíu. Son momentos que asoceden namás en nueches como la de San Xuan, cuando la música celta ye quien a integrase dafechu nel espíritu de la celebración.
Había quien siguía cada tema con entusiasmu, quien baillaba colos pasos y les vueltes tradicionales —como les amigues y amigos de Ximielga la Saya— y quien simplemente se dexaba llevar pola música.
Un momentu per emotivu llegó con Perdayuri, la nuesa tema inspirada nel poema Do Not Stand at My Grave and Weep. Dedicámoslu a Ígor Medio y Carlos Redondo, de Felpeyu, finaos xustu facía venti años n’accidente de tráficu, precisamente dempués d’actuar nesti mesmu llugar. Por eso esti cantar y la so lletra garraron esa nueche un significáu especial.
Al llegar temes como Asturies Danza na Celtia o Irish Fleadh, l’ambiente cargóse d’enerxía antes de dar pasu a la quema de la gran foguera, precedida d’una magnífica performance del grupu de teatru Nun Tris y de les nuestres amigues de Caparines.
Una nueche inolvidable nun escenariu impresionante, gracies a la cesión de la orquesta Tekila, que amenizó’l restu de la nueche. Esperamos que la vuelta de la música celta a la Foguera de San Xuan, la foguera d’Asturies, seya un regresu perdurable nes futures ediciones.
Vídiu y semeyes del Conciertu
© Semeyes: Nacho G.S.
