Guieldu nel IV Válgame Fest
Las Arenas de Cabrales
Folk-rock a los pies de los Picos d'Europa
Si nomamos Cabrales, quiciades va ser el quesu lo primero que te venga a la cabeza, pero’l conceyu Cabrales ye tamién la puerta d’entrada dende Asturies a los Picos d’Europa. En Cabrales el paisaxe llevántase vertixinosu ente crestes de piedra caliar y gargantes fonderes arañaes pol ríu Cares. Las Arenas ye la so llocalidá más poblada ya ellí faise’l Válgame Fest.
¿Y por qué Válgame? El nome tien la so hestoria. «Válgame nuestra señora…» son los versos d’entamu del romance qu’acompaña al Corri-corri, la danza tradicional de Las Arenas, considerada un de los bailles más antiguos d’Europa, con oríxenes que munchos asitien en ritos ancestrales prerromanos aislaos nestes vallinaes. De la copla cantada mientres sieglos sal el títulu d’esti festival, que celebra la so cita añal en plenu mes de mayu y entama precisamente’l Grupo Folclórico Corri-Corri del llugar.
En primavera, Las Arenas sacude’l sopor del iviernu. Los primeros grupos d’escursionistes, monteñeros y escaladores empiecen a dexar les sos mochiles polos chigres de la villa y les tiendes saquen a los sos escaparates los parches del Picu Urriellu, les navayes multiusos, los calcetos de llana y, por supuestu, les tayaes de quesu, que los visitantes lleven enantes de poner camín a Poncebos o adentrase na alta montaña. Mientres dura’l Válgame Fest, esi trasiegu constante de botes y cayaos crúzase col públicu del festival, compartiendo terrazes, botelles de sidra y los primeros conciertos al aire llibre del añu.
Les cais del pueblu, col so trazáu irregular, llénense de puestos d’artesanía que camuden por completu l’aspeutu habitual. Pola mañana y nes primeres hores de la tarde, bandines y grupos de baille van faciendo pasacais y animando cada rincón de Las Arenas.
N’Asturies la lluvia na primavera ye frecuente, asina que la carpa ye prácticamente obligatoria. Nella fainse los conciertos cuando cai la tarde y concéntrense les actuaciones de la nueche. Baxu’l so techu, la Plaza del Castañéu conviértese nel puntu d’alcuentru onde se xunten vecinos, xente llegada de tol conceyu, monteñeros y mozos d’otres llocalidaes cercanes, tanto d’Asturies como de la vecina Cantabria.
El Válgame ye un festival de folk y de rock, y esi encruz tócanos de cerca: en Guieldu llevamos años entemeciendo lo tradicional con soníos más contundentes, asina que tocar nun festival asina siéntanos como un guante.
Pola diversidá de públicos y a diferencia d’otres cites, por exemplu nel centru d’Asturies, equí el purista amante del folk nun ye mayoría. Nun ambiente tan variáu, onde los covers de temes bien conocíos son ésitu seguro, salir con composiciones propies yera pa Guieldu un bon esperimentu y una prueba de fueu.
Y la verdá ye que salió bien. La xente conectó dende los primeros temes pudiendo comprobar que les nueses pieces tamién tienen fuercia pa enganchar a un públicu tan dispar.
El Válgame merez la pena vivilo: el pueblu ente montañes, la gastronomía del conceyu, agospios con encantu, los puestos d’artesanía (de la de verdá), l’animación de les cais enantes de qu’empiece la música y bien acertada siempres la programación de conciertos. Nós yá tenemos ganes de volver.
¿Quies ver el vídeo?
Vídeo y Semeyes del Concertu
© Semeyes: Eire Comunicación
