Guieldu nel II Semando Fest
Uviéu
Compartimos cartel con tonada poética, punk-rock y hip-hop asturianista.
El 9 febreru del 2024 tocamos na sala Lata de Zinc d’Uviéu, dientru del II Semando Fest. Foi’l nuesu primer conciertu d’esi añu, y tamién ún de los más interesantes, porque lo que se sofita nesti festival va más allá de la música.
L’asturianu ye una llingua cola so gramática propia, cola so Academia, con una tradición lliteraria viva y con más de 600.000 persones na comunidá que lu falen, con distintos graos de fluidez. Peró como bien sabéis, nel tiempu d’escribir este llinies, nun ye oficial, y eso asítialu en desventaya frente al catalán, el gallegu, el vascu o el valencianu. Cuando xubimos música a les plataformes dixitales, nun esiste una categoría idiomática pal asturianu, como sí la hai pa les otres llingües cooficiales. Les redes sociales tampoco ufierten traducción automática del asturianu al restu de llingües, lo que lleva al usu del castellanu. Y cuando se convoquen ayudes estatales o concursos musicales, cuasi siempres s’ensamen «les llingües del Estáu» y l’asturianu queda fuera d’esa llista.
Por eso una lligua como la nuesa nun se caltién en llibros que garren polvu: caltiénse usándola na vida cotidiana, nel supermercáu, nel bancu, na televisión y, de xuru, na música. Y eso ye selemente lo que fai el Semando Fest.
El II Semando Fest celebróse na sala Lata de Zinc d’Uviéu, entamáu por Musicasturiana.com ya Ixuxú Cultura. Ye un escaparate de música moza fecha n’asturianu, abiertu a cualesquier xéneru musical. La nueche principió con Sandra Álvarez y Noemí González, que amestaron tonada y poesía feminista con un resultáu que nun pudo ser meyor. Dempués llegó Mostru l’Horru, con un hip-hop combativu y lletres que nun dexen indiferente a naide. Llueu llegamos nós, y piesyó Ochobre, col so hardcore punk asturianista, axuntando’l pogo que yera d’esperar. Por ciertu, convidaron al nuesu compañeru Jorge a xubir con ellos a tocar un tema col banjo.
Les entraes agotáronse díes enantes, asina qu’esfrutamos de una sala enllena. Guieldu aportamos un set intensu, colos temes más animaos del nuesu repertoriu, y la conexón col públicu fo total, anque anduviéramos un pocu xustios d’espaciu ellí arriba.
Anque les bandes del cartel yeramos moces, el públicu axuntáu en Lata de Zinc yera de toles edaes. Más allá del xéneru urbanu, tou lo relativo al rock sigue atrayendo especialmente al públicu adultu, y esa nueche notóse na sala. Dende l’escenariu veíase d’una forma bien singular: los más mayores al fondu, siguiendo los conciertos con sele, y los más mozos apegaos al escenariu, dándolo tou.
Anque bona parte de los nuesos temes son instrumentales, tamién tenemos temes cantaes, la mayoría n’asturianu. Nun solo porque ye la llingua de la nuesa tierra y de la música tradicional que nos da la inspiración, sinón porque cantar n’asturianu ye cantar na llingua que sintimos como propia y la que nos da identidá. Y amás, como pasa con otres llingües minoritaries, tien la so propia musicalidá.
Esfrutamos abondo del formatu y del restu de conciertos, y sobremanera del discursu y folosofía qu’hai tres del Semando Fest.
Vídeo y Semeyes del Conciertu
© Semeyes: Leticia Cernuda
