Guieldu nel Teatru San Francisco por San Patriciu

Llión

Una nueche de «sold out», guidaos a Irlanda, convidaos y el públicu de pie

El 17 de marzu del 2024, día San Patriciu, xubimos al escenariu del Teatru San Francisco de Llión, convidaos pol mesmu teatru pa la ocasión. Hasta entós tábamos moviéndonos sobremanera por festivales y sales con públicu de pie, un terrenu que dominamos y nel que sentímonos como’n casa. El teatru yera un formatu distintu que queríalmos esplorar, porque la música celta ye axeitada pa bailar pero también les capes, les atmósferes, lleven a la introspeición, a sintila colos güeyos zarraos.

Un momentu del conciertu de la banda de música celta Guieldu mientres el conciertu de San Patriciu nel Teatru San Francisco de Llión (2024)

Sabíamos que les entraes per internet yá rozaben el 80% del aforu, pero nun imaxinábamos que, al abrir la taquiella esa mesma nueche, el teatru colgaría el cartelu de sold out. Nun ye daqué al que teamos avezaos. Nun festival nunca sabes cuánta xente va parar delantre del escenariu, pero un teatru coles entraes escosaes ye otra cosa: eses persones decidieren de mano, con nome y apellíos, que queríen pasar la nueche escuchándonos a nós.

Carmen Tomé, violinista de Guieldu mientres l'actuación de la banda nel Teatru San Francisco de Llión, en marzu de 2024.
Laura Méndez, nos teclaos de Guieldu nel conciertu del Teatru S. Francisco.
Susana Sors, voz y guitarra acústica de Guieldu n'una fotografía tomada mientres el conciertu de la banda asturiana de música celta nel Teatru San Francisco

Anque ente’l públicu había bien de xente que yá nos conocía, pa ser xustos, hai que reconocer que tamién taba un porcentaxe pequeñu que nun sabía bien con qué se diba atopar. Si te falen de música celta, ye fácil imaxinar un grupu posáu con preseos acústicos, non una banda con batería, guitarres eléctriques y baxu. Así que’l nuesu soníu foi una sorpresa pa toes eses persones.

Héctor, flautista de Guieldu y Susana, cantante de la banda y guitarrista actuando nun conciertu.

Tamién ye verdá qu’adautamos el repertoriu al auditoriu. Tenemos temes más atmosféricos, progresivos o balades que nun siempres entren nos setlists de los festivales, pero’l Teatru San Francisco yera l’espaciu axeitáu pa esfrutalos. Asina que podemos dicir que ganamos a esa nueva audiencia.

Esa nueche amás tuvimos dos convidaos de luxu: el dulzaineru Antolín Cardeñoso, «Tolo», y l’acordionista Sergio García, «Segis». Xubir a dos referentes de la tradición musical de Llión a l’escenariu del Teatru San Francisco foi otra manera de tender pontes ente’l nuesu soníu y los raigaños del públicu que teníamos delantre.

Antolín Cardeñoso, "Tolo" tocando la dulzaina como artista convidáu nel conciertu de Guieldu nel teatru San Francisco de Llión, en marzu de 2024
El acordionista Sergio Garcia "Segis" acompañando a Guieldu como artista convidáu nel conciertu de Llión, en marzu de 2024

Tando’n San Patriciu, dalgunos temes irlandeses del nuesu repertoriu tamién cobraron protagonismu, como «Irish Fleadh» o «Eireann Set». En dambos casos son pieces formaes por un set de temes tradicionales llevaos al nuesu terrén, con melodíes fácilmente reconocibles pol públicu. Tanto foi asina que, pa cuando llegaron estos temes, bona parte de la sala yá se llevantara de les sos butaques, aplaudiendo al compás.

Sold out de Guieldu nel conciertu del Teatru San Francisco.

Esti conciertu foi una esperiencia bien enriquecedora pa Guieldu y dionos pie a perfilar esti tipu de formatu, n’auditoriu y públicu na butaca. De fechu, yá tamos trabayando en nuevos temes pensaos pa esfrutase asina, sía nun teatru o nel sofá de casa. Dalgunu d’ellos tará nel nuesu próximu discu.

¿Quies ver el vídeo?

Vídeo y Semeyes del Conciertu

© Semeyes: Enrique M.