Guieldu na Xinta na Cai d’Avilés 2024
Avilés
Pusímos-y el ramo a la "Comida en la Calle" de la nuesa villa.
El Llunes de Pascua volvió amosar la cara más folixera y comuñera d’Avilés. Les Fiestes del Bollo son, de toles que se faen na ciudá, una de les poques que caltienen el so posu d’asturianía. Nacíes nel 1893 gracies al puxu del doctor Claudio Luanco y la so cuadriella d’amigos, les fiestes nun dexaron de camudar col pasu’l tiempu. Un bon exemplu ye la mesma Comida en la Calle, que magar que parez que lleva faciéndose dende siempres, ñació nel 1993 pa conmemorar el centenariu de les festes y da-yos una proyeición mayor. D’ende ehí p’arriba, la xinta na cai foi medrando añu a añu en xente y en sonadía.
La edición de 2024 volvió amontonar milentes de persones nun ambiente onde la ciudá acomódase na cai de manera natural: mentanto les meses enllenen les cais del cascu vieyu ente empanada, tortiella, embutíos y botelles de sidre, la mocedá garra “l Parque de Ferrera pa facer la folixa a la so manera.
Ente” l baruyu y los pinchadiscos con música electrónica per cualesquier recazu, Avilés precisaba pa esi día una banda sonora que a la midida de les sos tradiciones. Y ye que falar de música celta n’Asturies y nun mentar la nuesa villa sería dexase media hestoria nel camín. Avilés tien un alcuentru especial abondo col folk, porque foi y ye un pozu inagotable de músicos que lleven décades dándo‑y una vuelta de rosca a la música tradicional. N’Avilés el folk y la música celta créase, prodúcese, síntense y vívese de afechu.
Y pa dexalo bien nidiu, Guieldu xubió al palcu la Plaza España pa poner el ramu a les festes. El conciertu volvióse un alderique continuu col xentolín, que bailló xirandiyes, muñeires y, señaldaramente, la danza, un de los bailles con más solera ya hestoria de la villa. Esti baille tan vieyu, tien un xeitu paecíu coles otres dances en corru del arcu atlánticu, como les bretones, au la xente gárrase tamién poles manes pa baillar en comuña.
Ver a la xente cantando dalgunu de los nuesos temas foi’l meyor pagu que podíamos llevar. Cuando la xente canta les tos cantares, la música dexa de ser tuya y pasa ser de toos: quédase nes alcordances d’otres persones. Esi ye’l meyor premiu que podemos recibir pola nuesa xera.
Tocar na casa propia, sintiendo l’abrazu de la xente nuna xornada tan prestosa, volvió traenos a la memoria que la música cobra tol so sentíu cuando se comparte na cai.
¿Quies ver el vídeu?
Vídeu y Semeyes del Conciertu
