Guieldu na Folixa na Primavera
Mieres
Guieldu llevó al direutu Memories de Deva nuna de les grandes cites asturianes de la música celta.
N’Asturies ye bien sabíu que la temporada de festivales folk suel entamar al primeros d’abril cola Folixa na Primavera de Mieres, que cada añu enllena la ciudá de música celta, folclore asturianu ya ambiente folixeru enredor de la sidre, nuna de les cites importantes del calendariu festivu asturianu.
Pa Guieldu, amás, la edición del 2025 tuvo un significáu especial. A penes unos díes dempués de la publicación de Memories de Deva, la Folixa foi’l primer escenariu nel que pudimos llevar al direutu dellos de los temes del nuevu discu que tovía nun tocáramos delantre’l públicu.
Tocónos pesllar la nueche del sábadu 5 d’abril nel escenariu del Parque Xovellanos. Llegábamos dempués d’una nueche que yá axuntara públicu abondo y que tuvo como ún de los sos momentos más esperaos el regresu de Skanda, que tornaba a los escenarios dempués d’una década de silenciu, acompañada pola Banda Sinfónica del Ateneo Musical de Mieres y la Banda de Gaites Villa de Mieres.
La Folixa na Primavera lleva yá más de tres décades d’hestoria. Ñació nel entamu de los años 90 a iniciativa del grupu de baille Prau Llerón y, en 2025, tenía amás un motivu especial pa celebrar: yera la primer edición dempués de que la cultura sidrera asturiana fora declarada Patrimoniu Cultural Inmaterial de la Humanidá. La programación musical del fin de selmana axuntó a Herbamora, Xurxo Fernandes, Skanda y Guieldu.
Asina que cuando llegó’l nuesu turnu atopámonos con un públicu yá dafechu metíu na fiesta y con ganes de siguir esfrutando del restu la nueche.
Subimos al escenariu con dalgún retrasu, pero con munches ganes. Ente los temes nuevos de Memories de Deva taben «Laridenn eus Asturies», au estrenamos bombarda bretona, y «Asturies Danza na Celtia», na que incorporamos la gaita ellectrónica o, meyor dichu, un punteru ellectrónicu mangau a una gaita tradicional asturiana.
Anque quiciabes nun seya lo más profesional dicilo, l’ambiente que tenemos delantre del escenariu inflúinos siempre nel ánimu. Cuando vemos al públicu entregáu,ximelgandose, montando dances, cantando… esfrutando del conciertu, esa enerxía acaba contaxandonos tamién a nós y fai que Guieldu gane en dinamismu. Esfrutamos enforma, tou ello a pesar de l’orbayu y de que la hora yá yera avanzada.
La Folixa tien daqué que presta especialmente: axunta distintes formes d’entender la cultura asturiana y ponles a convivir nun mesmu espaciu. La sidra, el folclore, la música asturiana y el folk atlánticu mézclense con naturalidá énte un públicu de toles edaes, qu’escueye les sos actuaciones favorites porque, haber, hai pa toos: dende la chavalería de venti años hasta les pareyes de xubilaos. Una cellebración que convida a esfrutar de la identidá asturiana.
Gran velada de música y un conciertu pa la alcordanza Esperamos volver tocar na Folixa na Primavera de Mieres n’otra ocasión; mentanto, nun faltaremos ente’l públicu, esfrutando de la fiesta.
¿Quies ver el vídiu?
Vídeo y semeyes del Conciertu
© Fotos: Pablo Semeyes
