Guieldu na Nueche Celta d'Ayer
Soto d'Ayer
Zerramos una nueche pasada por agua, so la sombra nocherniega del castiellu.
El domingu 7 de setiembre de 2025, Soto d’Ayer convirtióse por un día na capital de la música celta asturiana. Les fiestes de Miravalles acoyeron la edición nueva de la Nueche Celta, la tercera dende que l’eventu —que vivió la so etapa dorada ente’l 1996 ya’l 2007— recuperaranlo nel 2022 dempués d’años de silenciu. Y cola Torre Soto, del sieglu XII, vixilando dende l’altu, como lleva faciendo ochocientos años, el pueblu volvió enllenase de música asturiana.
El cartelu nun dexaba llugar a duldes sobre l’ambición de la cita: la Banda Gaites El Gumial entamó la nueche a les ocho, les pandereteres Herbamora tomaron relevu a les nueve y, a les diez y media, xubió al escenariu Llan de Cubel, ún d’esos nomes que nun precisen presentación nel folk asturianu y que lleven décades siendo referencia obligada de l’escena. Compartir nueche ya escenariu con ellos por segunda cegada na nuesa trayectoria tan curtia foi, ensin esaxerar, ún de los motivos polos qu’esta cita va quedar marcada nel calendariu de Guieldu.
El tiempu, eso sí, nun puso les coses fáciles. La lluvia y un cielu desapacible dexáronnos con cierta baxona antes de xubir al escenariu pa cerrar el cartelu tres Llan de Cubel. Pero bona parte del públicu aguantó estoicamente, con un bon puñáu d’incondicionales na primer fila que nun taben dispuestos a dexar que l’orbayu-yos aguara la fiesta: cantaron y baillaron baxo la lluvia como si’l cielu tuviera estrelles y, con esa enerxía en plan «¡esto ye Asturies!», zarramos la nueche dándolo too, como en cada actuación.
El formatu de les nueches celtes, tan popular n’Asturies durante los años 80 y 90, paez que se va recuperando pasu ente pasu, con regresos como esti de Soto o’l de la Nueche Celta de Candás, y con cites que siguen en pie dende los sos entamos, como la llexendaria Noite Celta de Porcía, que en 2024 celebró yá la so 40.ª edición y na que tamién tuvimos el privilexu d’actuar, una vegada más xunto a Llan de Cubel. La lluvia podrá calar hasta los güesos dalguna que otra nueche, pero nun hai agua capaz d’apagar el fueu celta que Asturies lleva encendiendo, branu tres branu, dende fai yá cuatro décades.
© Semeyes: Analia Pello