Guieldu torna'l Cachu Fest de Trabáu

Degaña

Volvimos a Trabáu, na edición homenaxe a Rosa Cunqueira.

El Cachu Fest ñació nel 2023 del enfotu colectivu de La Guarida del Cunqueiro y Espacio Tormaleo, col empeñu d’un puñáu de persones convencíes de que’l suroccidente asturianu merecía la so propia cita cultural. Ente eses persones, con un papel bien destacáu, taba Rosa Cunqueira, alma de La Guarida del Cunqueiro y Muyer Rural d’Asturies nel 2022, que dedicó bona parte de la so enerxía a que la tradición d’esti territoriu —la so artesanía, la so llingua, la so memoria— nun se perdiera.

En Guieldu tuvimos la suerte de participar d’aquella primer edición, y fuimos testigos del puxu que Rosa yera quien a contaxar. Por eso, cuando selmanes más tarde llegaron les noticies del tráxicu accidente que‑y quitaría la vida meses dempués, la perdida sentiémosla abondo de cerca.

El testigu recoyólu’l so fíu Vítor, que siguió (cola mesma tenacidá que deprendiera en casa) el llabor de dinamizar y revalorizar la so tierra. Y asina, en setiembre del 2025, llegó una dición nueva del Cachu Fest: non na más como una continuación, tamién como un homenaxe a la muyer que fixo tanto pola cultura del suroccidente asturianu. Que volvieran llamanos pa formar parte d’esa cita foi un auténticu honor.

El sábadu compartimos escenariu con bandes perbones: el tríu Picarós abrió a les nueve, los nuesos amigos de BREO tomaron el relevu y, enantes que nós, De Ninghures. Lo que principió como un cartelu de conciertos foi convirtiéndose, según medraba la nueche, en daqué más paecío a unafolixa compartida, na que en más d’un momentu los propios músicos de les bandes que yá tocaran o taben por tocar amestábanse col públicu pa baillar y aplaudir, esborrando esa llinia invisible que dixebra l’escenariu de la pista. Tamién ayudó animar la nueche Santi Galguera, que pela tarde impartiera talleres de baille asturianu y pudo llueu ponelos en práctica.

En Guieldu teníemos programáu salir a la una y media la madrugada, pero dellos contratiempos fueron acumulando retrasu tres retrasu, y nun xubimos al escenariu hasta les trés. Llueñe de restar‑y fuerza a la nueche, l’ambiente caltúvose por tolo alto.

Como nun podía ser d”’otru mou,“otra manera, el nuesu entusiasmu llegó intactu a eses hores gracies al bon ambiente que yá veníen dexando les bandes anteriores y a que’l públicu respondió. Trabáu, a eses altures de la madrugada, yá nun distinguía ente quien tocaba y quien baillaba: tou yera una mesma folixa, una mesma manera de celebrar lo que Rosa llevaba años defendiendo.

rabáu sigue siendo, gracies a esi esfuerzu colectivu que Rosa ayudó a encender, esi pequeñu gran epicentru cultural del suroccidente asturianu. Y la música, una vegada más, ayudó a que’l so nome siguiera sonando.