Guieldu nel Festival Intercelticu de Lorient
Breizh
Asina foi’l nuesu conciertu nel FIL, una de les grandes cites de la música celta.
Casi un millón de visitantes. Esa ye, a grandes traces, la magnitú del Festival Interceltique de Lorient, la gran cita del interceltismu internacional que se celebra n’esta ciudá bretona. En 2025, el festival celebró la so 54.ª edición baxo’l lema Les cousins d’Amérique, con un homenaxe a les comunidaes de la diáspora celta n’Acadia, Luisiana y Quebec. Ñacíu en 1971, el FIL convirtióse colos años nun puntu de xuntanza obligada pa loss paises celtes y pa les músiques que, dende distintos territorios, caltienen vivu esi vínculu atlánticu. Por eso, esti conciertu yera especialmente importante pa nós.
Foi’l domingu 3 d’agostu cuando xubimos al escenariu de la Place des Pays Celtes, ún de los puntos neurálxicos del festival. Yera la nuesa primer vez tocando’n Lorient, y notóse nes ganes. Dende los primeros compases, el públicu respondió con una enerxía y una entrega ablucantes, faciendo que’l conciertu se convirtiere nuna esperiencia perguapa pa nós.
A diferencia d’otres bandes de la programación, que suelen repetir actuación dellos díes a lo llargo del festival, el pasu de Guieldu por Lorient foi un conciertu únicu. Y quiciabes por eso fízonos especial ilusión lo que pasó al acabar: delles persones averáronse a entruganos si tocaríamos otru día.
Que daquién te pregunte cuándo vuelves dempués de vete tocar por primer vegada ye, sicasi, una de les meyores señales que puede recibir una banda. Y más nun festival como Lorient, onde cada agostu xuntense músicos, públicos y tradiciones de tol mundu celta.
Pero la nuesa presencia nel Festival Interceltique foi tamién una oportunidá pa vivir Lorient dende dientro. Formar parte de la programación nun significa namás xubir a un escenariu: tamién facilita acceder a los distintos espectáculos del festival y compartir espacios con músicos y grupos d’otres naciones.
El nuesu conciertu coincidió amás col día de la Grande Parade des Nations Celtes, lo que permitionos esfrutar del multitudinariu desfile que se retransmite en direutu pela televisión y asistir como espectadores a Horizons Celtiques, el gran espectáculu nocherniegu del festival nel Stade du Moustoir. Una producción que xunta música, danza y cantu nun gran alcuentru de les cultures celtes. Tar ellí, esta vegada dende l’otru llau del escenariu, foi otra manera d’esperimentar la dimensión d’un festival que, durante unos díes, camuda Lorient nun auténticu puntu de xuntanza atlánticu.
Y ellí vivimos tamién ún d’esos momentos que queden na memoria. Ente’l públicu taba Alan Stivell, acompañáu pola so muyer, Marie-José. Pa Guieldu, atopanos con Stivell en Lorient tenía un significáu especial. La so música y la so manera d’entender la cultura celta formen parte de les nueses referencies y d’esi camín que, d’una manera o otra, tamién nos llevó hasta equí.
Fiximos una semeya con él (que nun ye precisamente la meyor semeya de la historia, pero eso ye lo de menos). Ye una d’eses imáxes que guarden un recuerdu que paga la pena conservar: coincidir, como públicu, con ún de los nuesos grandes referentes nel corazón del Festival Interceltique.
Pa Guieldu, xubir a la Place des Pays Celtes foi sumanos, por primera vegada como banda, a una tradición que lleva décades llevando la música asturiana hasta Bretaña. Y facelo amás xunto a otros músicos y proyectos asturianos presentes nel festival permitiómos sentir que formábamos parte d’un daqué que va más allá d’un conciertu concretu: una presencia asturiana que, añu tres añu, atopa’n Lorient ún de los sos grandes escaparates internacionales.
No depende de nosotros que haya una próxima vez, pero sí sabemos que queremos que la haya.
Quedamos cola esperiencia, col ciñu recibíu, colos alcuentros, cola oportunidá de vivir el festival tamién como espectadores, con esa semeya xunto a Alan Stivell y, sobre too, col agradecimientu a la organización del Festival Interceltique por escoyenos y pol tratu que nos brindó.
Y tamién con una sensación que nos acompaña dende aquel domingu: la d’haber dexao al públicu con ganes de más.
Oxalá sía’l principiu d’una llarga relación.
Vídiu y semeyes del Conciertu
© Semeyes: Román Tabourel
