Guieldu nel Festival Folk & Rock Nas Portelas
Lubián
Un alcuentru que nun vamos escaecer, na raya d'Alta Sanabria xuntu a Milladoiro.
Les fronteres oficiales poques vegaes coinciden colos estremos culturales ya humanos. La xeografía real d’un territoriu nun la dibuxen les llendes alministratives d’un mapa, sinón la memoria compartida, la llingua común y les tradiciones que fluyen llibremente ensin entender de divisiones polítiques. Un exemplu perfeutu d’esta realidá atopámoslo na llocalidá zamorana de Lubián, asitiada n’Alta Sanabria, en plena raya con Galicia y bien cerca Portugal, au la identidá compartida xunta la so xente perriba de cualesquier mapa oficial.
Nesti conceyu piquiñín celébrase dende hai diecinueve ediciones el Festival Folk & Rock Nas Portelas. El nome fai referencia a «As Portelas» (o Les Portielles), que ye como se conoz hestóricamente a esta zona de pasu montaña ente la meseta zamorana y les tierres gallegues d’Ourense. Una denominación venceyada a la mesma xeografía d’un enclavie qu’acueye esta cita añal col folk y el rock del noroeste peninsular.
La verdá ye que llegamos a Lubián un poco cansaos. En namái una selmana percorriéramos más de 2.600 kilómetros per carretera: dende Avilés fuimos tocar a Carrizo de la Ribera (Llión), d’ellí direutos al Festival Interceltique de Lorient en Bretaña, y dende Francia de vuelta pa baxu y cruciar la península hasta Lubián, en Zamora. Foi una paliza de furgo en bien pocos díes, pero tamién veníamos entusiasmaos pol ésitu del nuesu conciertu nel FIL.
La enerxía multiplicóse al llegar. El festival entamó esi 6 d’agostu de 2025 pola tarde na plaza Horta do Cura, con formaciones tradicionales llegaes de Galicia, Portugal y la mesma Zamora: un pequeñu mapa sonoru d’esa frontera difusa de la que falábamos de primeres. Pero foi yá pela nueche, nel escenariu de Fontarbela, cuando llegó’l momentu que fizo increyible esta cita pa nós: compartir festival, escenariu y backstage nada menos que con Milladoiro, grupu pioneru del folk gallegu de fusión atlántica y referente clave pa la primer escena asturiana. Coincidir d’esta manera con una formación tan fundamental na música celta ibérica dio‑y a la xornada un calter únicu.
El conceyu de Lubián y los sos vecinos faen cada añu un esfuerzu per grande pa que’l so festival tea al altor de les grandes cites de festivales folk. Al traviés de les sos diecinueve ediciones, pol escenariu del Festival Folk & Rock Nas Portelas pasaron nomes de referencia de la música celta peninsular como Carlos Núñez, Hevia, Luar Na Lubre, Berrogüeto o los mesmos Milladoiro. Una trayeutoria impecable que fai d’esti rincón de l’Alta Sanabria un puntu d’alcuentru de primer nivel.
Ensin dulda, el Festival Folk & Rock Nas Portelas foi la guinda perfeuta pa la selmana más intensa hasta la fecha na hestoria de Guieldu. Un públicu entregao dende la tema primera, una organización impecable y esi alcuentru cercanu xunto a un grupu míticu como Milladoiro —de quien llevamos conseyos y pallabres de ciñu— convirtieron la velada nuna alcordanza imborrable.
