Guieldu nel folkomillas 2025
Comillas, Cantabria
La primera visita a tierres cántabres que superó toles nueses espeutatives
Folkomillas, en xunu de 2025, foi la ocasión de presentar a Guieldu en Cantabria. Teníamos munches ganes de llevar la banda a la comunidá vecina, onde hay una escena folk bien activa y una rede de festivales con un fuerte respaldu del públicu, magar que, como tantes iniciatives culturales d’esti tipu, caltiénense gracies al enfotu y a la dedicación altruista de quien les entama.
Ente estos festivales, Folkomillas ocupa un llugar destacáu. Llegar a Comillas, un de los pueblos más guapos del norte, suponía pa nós muncho más que sumar una fecha’l calendariu: yera’l nuesu conciertu primeru en Cantabria, díbemos alcontranos con coyacios y comprobar cómo respondía’l públicu a la nuesa música.



Una de les coses más guapes foi coincidir na programación del mesmu día coles nueses amigues de 6 Riales. Elles tocaron pela tarde, nun conciertu que esfrutamos dende’l públicu, y unes hores dempués, yá nel nuesu conciertu, volvíamos alcontranos sobro l’escenariu pa tocar con elles «Rondes», la tema que compartimos en Memories de Deva. Poder llevar al direutu un canciu que forma parte del nuesu discu xunto coles sos protagonistes foi un d’esos luxos que regalonos Folkomillas.
La respuesta del públicu mientres el conciertu de Guieldu foi formidable. Poques vegaes atopamos una enerxía tan vibrante y apurrida dende los primeros compases. Esa conexón caltúvose mientres tola actuación y fixónos esfrutar muchísimo.

Dempués foi la vez de Corquiéu, compañeros d’Asturies bien queríos en Cantabria, onde cunten con un públicu especialmente fiel. Ente les sos files taba amás Celia al vigulín, que formó parte de Guieldu nos nuesos primeros años, asina que volver coincidir con ella sobro un escenariu, anque dende formaciones distintes, tuvo un significáu especial pa nós.
Los cántabros de Tudanca cerraron la nueche. Una formación con una manera bien propia d’averase al folk, un broche fenomenal pa la programación del vienres, primer día del festival.
El tratu de la organización foi impecable’n tou momentu. Folkomillas ye un festival que puede presumir de tar l’altor de les meyores cites del folk, tanto pola so programación como pol curiáu con que lo preparan y vívese cada xornada. Pa nós foi un verdaderu placer formar parte del cartel.
La esperiencia dexónos tamién una reflexión que va más allá d’aquella nueche. Galicia, Asturies, Cantabria, Llión ya’l norte Portugal compartimos tradiciones musicales con munchos puntos d’alcuentru, pero entá faltanos que les bandes tengan más ocasiones pa circular pelos territorios vecinos.

Los grupos asturianos viaxen con frecuencia a Cantabria, pero nun asocede tanto en sentíu contrariu. Hai formaciones cántabres magnífiques que prestaríanos ver más tocando n’Asturies. Sería perbonu qu’esi intercambiu fuera cada vegada mayor y que los festivales d’ambes comunidaes tuvieren más ocasiones pa compartir artistes y propuestes.
A la fin, esi movimientu de músicos y grupos ente territorios cercanos ye tamién una forma de construyir un interceltismu ibéricu: non solo compartir raigaños, sinón tamién escenariu, públicu y d’oportunidaes.
Lo que llevamos de Comillas y, sobremanera, de los comentarios posteriores en redes sociales, foi la sensación de que’l públicu quedó con ganes de volver ver a Guieldu en Cantabria. Oxalá esa enerxía nun quede nuna sola nueche nin nun solu escenariu. Hai festivales cántabros a los qu’entá nun llegamos, y depués de lo vivío en Folkomillas, tamos convencíos de qu’esi esperáu realcuentru llegará y tendrá de ser bien especial.
¿Quieres ver el vídeo?
© Fotos: Enrique M.

